இந்தியாவின் புதிய பந்துவீச்சு பயிற்சியாளர் யார்? தமிழகத்தை சேர்ந்த முன்னாள் வேக பந்து வீச்சாளர் லட்சுமிபதி பாலாஜியின் பெயரும் பரிசீலிக்க பட்டு வருகிறது.
2024 டி20 உலகக் கோப்பையின் இறுதிப் போட்டியின் முடிவில் இந்திய அணியின் தலைமைப் பயிற்சியாளராக ராகுல் டிராவிட்டின் பதவிக்காலம் முடிவுக்கு வந்தது, அங்கு இந்தியா தென்னாப்பிரிக்காவை ஏழு ரன்கள் வித்தியாசத்தில் வீழ்த்தி 17 ஆண்டுகளுக்குப் பிறகு மதிப்புமிக்க கோப்பையை வென்றது.
இந்தியாவின் புதிய பந்துவீச்சு பயிற்சியாளர் தேர்வு
இந்திய அணியின் தலைமைப் பயிற்சியாளராக கவுதம் கம்பீர் செவ்வாய்க்கிழமை நியமிக்கப்பட்டதைத் தொடர்ந்து, இந்திய அணியின் பந்துவீச்சு பயிற்சியாளர் பதவிக்கு முன்னாள் வீரர்களான ஜாகீர் கான் மற்றும் லட்சுமிபதி பாலாஜி ஆகியோர் பரிசீலிக்கப்படுவதாக தகவல்கள் தெரிவிக்கின்றன.
பவுலிங் பயிற்சியாளர் பதவிக்கு ஜாகீர் கான் மற்றும் லக்ஷ்மிபதி பாலாஜியின் பெயர்களை பிசிசிஐ ஆலோசித்து வருகிறது. வினய் குமாரின் பெயரில் பிசிசிஐ ஆர்வம் காட்டவில்லை, என கூறப்படுகிறது.
ஜாகீர் கான், இந்திய அணிக்காக 92 டெஸ்ட் போட்டிகளில் விளையாடி 311 விக்கெட்டுகளையும், 309 சர்வதேச போட்டிகளில் விளையாடி அனைத்து வடிவங்களிலும் மொத்தமாக 610 விக்கெட்டுகளையும் எடுத்துள்ளார். அவர் இந்திய அணிக்காக விளையாடிய சிறந்த இடது கை வேகப்பந்து வீச்சாளர்களில் ஒருவராக கருதப்படுகிறார்.
பாலாஜி எட்டு டெஸ்ட் போட்டிகளில் இந்தியாவுக்காக விளையாடியுள்ளார். அதில் அவர் 37.18 சராசரியில் 27 விக்கெட்டுகளை வீழ்த்தி உள்ளார். மறுபுறம், அவர் 30 ஒருநாள் போட்டிகளில் 39.52 சராசரியில் 34 விக்கெட்டுகளை கைப்பற்றியுள்ளார்.
கௌதம் கம்பீர் தலைமைப் பயிற்சியாளராக நியமிக்கப்பட்டதைத் தொடர்ந்து, இந்திய அணிக்கு புதிய துணைப் பணியாளர்கள் தேர்வு நடந்து வருகிறது. இந்திய அணியின் பந்துவீச்சு பயிற்சியாளராக இருந்த பராஸ் மஹம்ப்ரேயின் பதவிக்காலம் முடிவடைந்த நிலையில் சாஹீர் கான் மற்றும் லட்சுமிபதி பாலாஜியின் பெயர்கள் பரிசீலனையில் உள்ளது.
இந்திய கிரிக்கெட் அணியின் தலைமை பயிற்சியாளராக கவுதம் கம்பீர் தேர்வு
முன்னதாக, இந்திய ஆண்கள் கிரிக்கெட் அணியின் புதிய தலைமை பயிற்சியாளராக முன்னாள் கிரிக்கெட் வீரர் கவுதம் கம்பீர் நியமிக்கப்பட்டுள்ளதாக இந்திய கிரிக்கெட் கட்டுப்பாட்டு வாரியத்தின் (பிசிசிஐ) செயலாளர் ஜெய் ஷா செவ்வாய்க்கிழமை அறிவித்தார்.
கம்பீர் இந்திய அணியின் இடது கை தொடக்க ஆட்டக்காரராக இருந்தார் மற்றும் இந்தியன் பிரீமியர் லீக் 2024 இல் கொல்கத்தா நைட் ரைடர்ஸ் அணியின் வழிகாட்டியாக பணியாற்றினார். கம்பீரின் வழிகாட்டுதலின் கீழ் KKR இந்த சீசனில் மூன்றாவது IPL கோப்பையை வென்றது.
ஜெய் ஷா தனது அதிகாரபூர்வ X கணக்கில், டீம் இந்தியாவின் புதிய தலைமை பயிற்சியாளராக கம்பீரின் நியமனத்தை அறிவித்தார்.
கம்பீர் மீது தனக்கு முழு நம்பிக்கை இருப்பதாகவும், இந்திய கிரிக்கெட்டை முன்னோக்கி வழிநடத்த அவர் சிறந்த நபராக இருப்பார் என்றும் பிசிசிஐ செயலாளர் மேலும் கூறினார்.
“இந்திய கிரிக்கெட் அணியின் புதிய தலைமைப் பயிற்சியாளராக கௌதம் கம்பீரை வரவேற்பதில் மிகுந்த மகிழ்ச்சியடைகிறேன். நவீனகால கிரிக்கெட் வேகமாக வளர்ச்சியடைந்துள்ளது, மேலும் கௌதம் இந்த மாறிவரும் கிரிக்கெட்டை நெருக்கமாகக் பார்த்து வருகிறார். நெருக்கடிகளைத் தாங்கிக்கொண்டு பல்வேறு பாத்திரங்களில் சிறந்து விளங்குகிறார். இந்திய கிரிக்கெட்டை தொலைநோக்கு பார்வையுடன் வழிநடத்த சிறந்த நபர் கௌதம், அவரது பரந்த அனுபவத்துடன் இணைந்து, இந்த உற்சாகமான மற்றும் மிகவும் விரும்பும் பயிற்சியாளர் பதவியை ஏற்றுள்ளார். அவர் இந்தப் புதிய பயணத்தைத் தொடங்கும்போது பிசிசிஐ அவருக்கு முழு ஆதரவளிக்கிறது” என்று ஷா X இல் எழுதியுள்ளார்.